La Serenìsima Repùblica de Venesia o Repùblica Veneta la xe stà on Stato che se gà svilupà a partire da la sità/capitale de Venesia.
La xe durà pì de 1.100 àni, da la fine del 7° secolo fin la fine del 1797.
La Serenìsima - el Stato dei Veneti - la xe stà la pì longa Repùblica al mondo (e "la pì serena").
Purtropo, come denuncià da tante asociasion e grupi culturali, sto capitolo inportante de la storia del Popolo Veneto no xe insegnà inte le scole italiane e el xe ridóto in poche righe inte i libri de scola.
|
 I Veneti i gà na storia documentà dal 1500 prima de Cristo, con na siviltà rafinà e industrioxa. I gaveva xà a che'l tenpo na só lengoa e alfabeto; i xera gran comercianti e abili sol mare. I gestiva la “via del’ambra” col mar Baltico. Dal V° secolo a.C. in vanti i gà fondà e svilupà cità come Padova, Este, Vicensa, Oderso, Altin e tante altre.
Verso el 2° secolo a.C. i Veneti i và a far parte spontaneamente de l’Inpero Roman e i ghe restarà fin a la caduta inte’l V° secolo d.C. Secondo la tradisión, el 25 de marso del 421 vién fondà Venesia, la “cità dei Veneti”, e inte’l 697 vien eleto el primo Doxe.
Col tenpo i Veneti i deventarà conpletamente indipendenti, na potensa marìtima e comerciale unica al mondo. Sìnbolo e protetór de la Republica Serenìsima el deventerà da l’àno 828 San Marco, raprexentà co el Leon co le ale.
Inte’l 1297 vien definìo in maniera precixa el sistema de Governo, fato dai mejo òmani e inte’l Stato Veneto vegnerà senpre garantìe anpie autonomie locali. Sto sistema eficente e lixiero el fa da atrativa pa tuta la teraferma veneta e tanti i xe stà i exenpi de teritori (la Marca trevixana inte’l 1338 e Verona inte’l 1405, pa far dó exenpi) che i dimandava de entrar a far parte de la Republica Veneta co le “dedisión”.
Inte’l 1500 la Serenìsima la xe parona dei mari e del comercio, tanto potente che inte’l 1509 praticamente tuta la Europa co la “Lega de Cambrais” la se organixa pa farghe goera. I Veneti dopo ani de goere ala fine i la spunta, sia grasie al valór militare, sia pa la bravura de la só diplomasìa. Inte'l 1571 ghe xe la teribile bataja de Lepanto contro i Turchi, on scontro co i Veneti in prima fila che i salvarà la Europa cristiana. Inte’l 1584 Venesia fonda la prima banca publica al mondo, el Banco Giro (la Banca d’Inghiltera xe sta fondà nel 1692).
Oltre ai comerci i Veneti i trionfa so le arti co pitori, scultori, muxicisti, comediografi, scritori, artijani che i gavarà na fama mondiale. Inte’l 1796 on exercito comandà dal generale Napoleone Bonaparte riva ai confini de la Republica pa atacare l’Austria. >a Serenisima la se gheva dichiarà neutrale ma na volta entrà inte i só teritori Napoleone el ocupa le cità principali e le fortése a tradimento, dichiarando solo dopo goera a la Republica, che la se vede costreta a far decadere el so governo legitimo: xera el 12 de majo del 1797.
Dopo la breve ocupasiòn francexe, i Veneti i vien sotomesi a l’Inpero austriaco pa tornare poco dopo danovo soto ocupasión giacobina. Inte’l 1814 el Congreso de Viena, confarensa de le potense che gheva distruto Napoleone, decide de no ristabilire la Republica Serenìsima ma de dare i teritori veneti a l’Austria.
Dal 1797 scumìsia on grave declino economico, conseguensa de enormi depredasión, sia economiche sia artistiche. Inte’l 1848 ghe xe la rivolta de Venesia che riproclama la Veneta Republica co Daniele Manin, ma dopo na rexistensa disperà inte’l 1849 la se arende.
Inte’l 1866 el Regno d’Italia dei Savoja el se alea a la potente Prussia e ataca l’Austria co l’obietivo de sotométare i Veneti. Nonostante le vitorie de le armi austro-venete sia par tera (Custoza) sia par mare (Lissa), el Veneto el vien ocupà da le trupe col tricolore sabaudo, par via dei tratati de paxe che vedeva comunque l’Austria sconfita da la Prùsia inte la bataja de Sadowa. la Italia, piena de debiti xà a chel tenpo, inpone grandi sacrifisi a la popolasión veneta (vd. la tàsa sol macinato) che presto vien portà a morire leteralmente de fame. Scumìsia cusì la granda emigrasión veneta: pì de 4 milioni de veneti dal 1866 i xe costreti a sbandonare la só tera e la só gente.
Inte’l 1914 s-ciopa la 1° Goera Mondiale, conbatùa in gran parte in tera veneta: metà dei squaxi 600.000 morti i sarà veneti. Pa no parlar de la seconda goera mondiale, indove la mejo xoventù veneta la vegnerà mandà a morire al fronte (vd. par exenpio la canpagna de Rùsia).
Finìa la goera i Veneti, nonostante tuto, da la povertà màsima i rièse a métare in pie on modelo economico invidià da tuto el mondo, fruto de quela voja de far e senso de sacrifisio che xe senpre stà caraterìstega de sto gran Popolo.
Uncó, nonostante mile problemi, da l’inquinamento a la imigrasión mal regolà, e sóto on sistema statale foresto che serca de cancelare la identità dei Veneti, el popolo Veneto, ridoto a na colonia, el xe comunque riconosù in tuto el mondo par la gran storia, la laborioxità, la solidarietà e el senso civico.
|
