Antonio Lucio Vivaldi (Venesia, 4 de marso del 1678 – Vièna, 28 de lujo del 1741), ciamà anca el Prete Rosso, el xe stà ón conopoxitór e violinista veneto.
Ligà a l'anbiente del tardo baròco venesiàn, artista de la Republica Serenìsima amirà da tuto el mondo, el xe conosudo soratuto pa i quatro conserti pa violìn ciamài "Le quatro stajón".
|
 La muxica de l’Ino Nasionale Veneto la xe baxà so la “Juditha Triumphans” de Antonio Vivaldi, conpoxitór veneto on mucio inportante, exeguìa pa selebrar la vitoria venesiana a Corfù, co xe stà libarà la ixola da l’asedio sol 1716: el andamento maestoxo in tre otave el riciama la orijinalità de i Veneti che tante volte i gà savésto “rónpare i schemi” e rivare a rixultài inovativi.
L’adatamento de la mùxica e la xonta de raquante batute al brano, che el xera stà in orìjine studià pa on testo latìn, i gà portà la conpoxisión a èsar pì adata a on Ino in lengoa veneta: i virtuoxixmi lìrici de l’orijinale i xe stà limità parché l’Ino el pòsa èsare cantà co fasilità da tuto el popolo, pur tegnendo salda la strutura orijinale.
El testo el xe fato de parole venete jenerali, in gran parte comuni al veneto veronexe, a quelo centrale e a quelo venesiàn: le finali –r –l le xe tìpiche de la varietà venesiana, veronexe, trevixana e belunexe. Pa raxón mètriche e de rima xe stà xontà forme tìpiche de qualche varietà (fondaminti, cei, fon, fen, ...).
On fià de ste qua le xe stà mése una in parte a st’altra cofà on sìnbolo ideale de la unità de tuto el popolo veneto, anca come lengoa: cusìta avér méso visìn a “fen fiorire” el verso “fon sù i fondaminti” el sistema problemi de mètrica (fon e fen i xe monosìlabi) e de rima (fondaminti rima co vinti) e insieme raprexenta la unità veneta da on estremo a st’altro del teritorio. La richésa de sfumadure de la lengoa, sostansialmente unitaria, la xe on strumento pa raprexentar el sfumar armònico de le realtà locali difarenti che la forma el Veneto e che le dà richésa al só teritorio.
Come tanti Ini, sta qua no la xe na conpoxisión contro “el nemigo” ma la xe on Ino pal propio Popolo. La muxica la xe stà conposta da on Veneto so comisión de la Republica Veneta de chel tenpo. El testo dèso el riciama la inportanza de la tradisión che la dà le risorse pa métare in pie on nóvo doman; el conta de i valori tìpici del Popolo Veneto come la voja de fare e el senso de la solidarietà, che tenpo indrìo i xera xà stà riconosésti a i emigranti veneti inte’l mondo. La tera che fiorìse dai monti al mare xe on sìnbolo de na crésita che no la xe solo svilupo industriale e urbàn, ma anca progrèso sociale e anbientale dato che el Popolo Veneto el gà senpre vivésto fra tera e aqua.
Pa finire ciaro el xe el riciamo al León de San Marco, pa defèndare la paxe e la libartà.
|
