La Bandiera de San Marco la xe on sìnbolo antico, fato de glorie, sacrifici e ideali de tanti e tanti Veneti che xe vegnésti prima de nialtri e che i xe riusìi a métare in pie una de la Repùbliche pì glorióxe che el mondo el gabia mai conosésto.
El Leon co le ale el xe on sinbolo arcaico che conpare tante volte parfìn soi reperti dei Veneti antichi
|
 La Bandiera de San Marco la xe on sìnbolo antico, fato de glorie, sacrifici e ideali de tanti e tanti Veneti che xe vegnésti prima de nialtri e che i xe riusìi a métare in pie una de la Repùbliche pì glorióxe che el mondo el gabia mai conosésto. El Leon co le ale el xe on sinbolo arcaico che conpare tante volte parfìn soi reperti dei Veneti antichi (dal 1000 a.C.), riportà so vaxi, cinturoni, ojeti vari.
El se cata danóvo, dopo secoli, co la Republica Veneta. Soi primi àni de vita de la Republica (697 d.C. el primo Doxe) le bandiere le jera sinbolejà da na cróxe; intel’828 do mercanti veneti, Bon da Malamoco e Rustico da Torcelo, i gà trafugà el corpo de San Marco da Alesandria d’Egito, da poco cascà soto el dominio islamico, portando a Venesia la presioxa reliquia dopo aver saltà i controli doganali arabi col stratagema de covèrxerla insieme a carne de mas-cio, considerà inpura e intocabile dai seguaci de Maometo. Se averava cusìta la profesìa: secondo la tradisión, difati, San Marco el xera sbarcà tenpo indrìo inte’l lido veneto pa scanpar a na burasca, in viajo da Alesandria d’Ejìto a Aquileja; on ànxolo el se gheva mostrà a lu so la spiaja e lo gheva saludà co “Pax tibi Marce, Evangelista Meus” (Paxe a ti Marco, Evanjelista meo), faxéndoghe l’anuncio che le xenti de chei posti lì in futuro i lo gavarìa venerà. In sta maniera qua Venesia la ciapava San Marco come só protetore.
El sìnbolo de l’Evangelista Marco el jera proprio on Leon alà. La jera anca na stratejìa dei òmani che guidava Venesia, senpre pì rica e potente, òmani che i gheva na lungimiransa inpresionante e i sercava de avere na granda autonomia rispeto a la Cexa de Roma. Inte’l 1096 ghe xe la prima testimoniansa scrita che parla de la bandiera de San Marco che tegneva tra le sate la Cróxe, consegnà al fiolo del Doxe Vitale Michiel I°, che partiva par la Crociata in Terasanta. Dal 1257 tute le navi venete le inalberava el vesilo col Leon.
L’araldica parò no la xe mai stà codificà in maniera precixa e ghe jera na serta libartà so la rafigurasión, co tante varianti: le trupe de fanteria le gheva de sòlito el San Marco co la Cróxe fra le sate e el color del Leon el xera de oro opur róso so fóndo bianco; la marina veneta invése la gheva el San Marco senpre color oro, ma so fóndo pórpora.
Se sà che el colore araldico dei Veneti el xe l’axuro e Venesia la ga senpre avuo l’axuro e l’oro, solo che sol mare no’l jera mìa on colore fàsile da identificare. Tanti i pensa che el libro (Vangelo) verto el voja dir “paxe” e quelo sarà invése “goera”, ma no xe mìa documentà sta roba qua, siben che ghe sia na forte credensa popolare a regoardo.
Soi tinbri e i boli vegnéa doparà de pì el Leon in tondo (in moleca) e le sie cóe le raprexenta i sie sestieri de Venesia. Sicome no ghe xera mìa regole, se pol catar vesìli co fondi e colori difarenti; sol Vangelo (serte volte podeva èsar anca n’altro libro) el moto riportà squaxi senpre el xe “Pax Tibi Marce Evangelista Meus”, ma se pol catare anca “Alliger Ecce Leo Terras Mare Sidera Carpo” o “Victor Tibi Marce Evangelista Meus”.
|
